Sach ke Saath Ek Mukalma (Urdu)

Kuch dino qabl ka waqya hai, mein raat ko namaz se laut raha tha masjid se kuch door dekha aik shaks sakht garmi mein chadar aurhey, chera jhukaye betha tha, siskiyon aur hichkion ki awazaein buhut numaya thien. Pehle mein ne socha ke shayad koi gadagar hoga apney hal ko ro raha hoga, phir mere dil se sada aayi ke usey “ja ke pooch kia dukh hai usey”. Mein ne qareeb ja kar salaam kia aur poocha “bhai kion pareshan ho, Allah ka ghar samney hai, taak raat hai , akhri ashra hai ramzan ka kion itna pareshan hotey ho. Us ney kaha ke ab masjidon bhi meri jaga nahi rahi, chand lamhon ki khamoshi ke baad us ne apna chehra upar kia to kia dekhta hun ek noor se damakta chera, jaise koi chaand zameen par utar aya ho. Mein tik tiki bandhey usey dekhta raha, us ne apni dagh daar, purani aur boseeda chadar utar kar bicha di, safed libaas, kaley ghaney baal aur aur taweel qad, mushke ambari ki khusbu, magar daaman taar taar aur cheherey par tafakur ke asrat numaya they. Mein to is duniya se ja raha tha ke ab kahin aur basera karun lekin phir tum nazar agaye. Muhabbat se apne pas bitha kar mujh se apney dil ki baat kehney laga, kehta hai mera naam “sach” hai aur mein is dunya ki bheer mein kahin kho gaya hun umuman ab bazaaron mein bikta hun. Itney saalon se intezar tha keh koi mujhe dekhey aur mera dukh poochey! aur mein usey bataon, magar rozana jhumbe ghafir mere samney se guzarta hai, mera qatl karta hai aur ghalti se agar koi pehchanta hai to woh daman jhatak kar bhag jata hai. Door khari ek boorhi tawaif hath mein tarazu liye hamari batein sun rahi thi us ne baat karna chahi lekin mein such se guftgu mein itna mehev tha ke mein ne usey phir kisi roz milne ko kaha. Mein ne poocha keh aj tum mujhe kion nazar aye, mein to barson se is hi masjid mein namaz partha hun? Mera sawal sun kar woh muskuraya aur kaha keh mein hamesha se tumhein dekhta hun lekin tum nazrien jhukaye muzmail sa chera liye khamosh se guzar jatey ho, so aj mein ne socha ke tum se baat karun. Mein ne be sakhta keh dia “to kaho, kia kehna chahtey ho?” us ne apni daastan sunani shuru ki aur mein sun taa chala gaya raat ke kayi pehr beet gaye. Kehta hai ke barson se tum ne mujhe tham rakha hai lekin tumhein siwa takleef ke aur kuch nahi mila, yeh sun kar meri bhi ankhein bhar ayein aur mein ne kaha “haan yeh sach hai” us ne kaha ke sirf teri hi wajha se mein yahan aya un warna aur sab alam bardaron ne mujhe apna maan ney se inkaar kar dia. Us ne poocha kion namaqulun ki tarha mere alam bardar baney huey ho, mere saath se siwa takleef ke aur kuch naa mileyga. Apney mulk ke siyasat danon, umaraa e waqt ko dekho, chahey hukumati ehelkaar hon ya insaaf key thekeydar sab mujh chor kar kitne sukoon mein hain. Is soch ne mujhe thori der ke liye pareshan kar dia, usne kaha munafiqat karna ab zaroori ho gaya hai to mein bhi jawab de betha “ke nahi hoti mujh se munafiqat”. Kehta hai chor dey yeh sachai ke rastey apney bachon ke kal ka soch! Mere dil ne jawab dia “chor dia Allah par mein ne sab kuch ab us hi ke supurd hai. Buhut samjhaya us ne ke usey apney dil ki qaid se azad kardun, apni zindagi se nikal dun, insaaf ki talash chor dey, imaandari ko tark kardey lekin meri zid ne mujhe rokey rakha. Akhirish ghanton ki behes ke baad woh bhi beyzaar ho ke keh para “Tu nahin sudhrey ga” Aur muskrata hua chala gaya. Us raat mein so nahin paya aur sochta raha keh sach ne mujh se sach hi kaha yeh alag baat hai keh sach ka sach buhut karwa tha. Haqeeqat yehi hai keh tamaam umer sachai ke rastey par chalney ke bawojood aj mujhe dar ba dar jhooton ke daftaron ke dhakey khaney partey hain. Na sukoon hai naa rozgar bas hai to ek sach ka saath aur ek umeed ke ek dinin goongi raton ko goyai mileygi aur meri zindagi mein to is ki umeed haar chukka hun magar shayad …………..

Advertisements

One thought on “Sach ke Saath Ek Mukalma (Urdu)

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s