Insaaf Ki Devi se ek Mulaqat ( Urdu afsan/Iqtebas)

Insaaf aur munsifana nizam kitabon ke roo se mazloom ko zalim ke shar se bachaney aur barabar ka badla lene ya muaf karney ke liye hota hai magar is sarzameen e Pakistan par hamesha se ulti ganga behti rahi hai. Chor ko sahu kaar per sabqat hai, jhootey ko sachey par aur zalim ko mazloom par fauqiat hasil hai.

Kuch dino pehle ki baat hai raat dhal chukithi Asmaan par chodwein ka chand chamak raha tha aur chandni apni joban par thi. Mein mushaqat bharey ek aur din ke ikhtetam ko puhnch raha tha. Fikar-e- maash mein khoya mein apne ghar ki janib kooch karney ko tha keh meri mulaqat phir us insaaf ka tarazu liye huey aurat se hui. Mujhe us ka chehra kuch jana pehchana laga. Ghaur se dekha to nazar aya keh us ke galey mein aik aahani tauq tha, ankhon par bandhi kali patti utri hui thi aur hathon mein ek tarazu tha aur doosrey hath mein talwaar, kaandhey jhukey huey they, saansein ukhar rahi thein. Jhulsey huey jism se yun lagta tha keh barson angaron par litaya gaya ho, kaprey phatey huey they jaisey saal ha saal se ismat zani ka shikar ho, ankhon se ansoo beh rahey they , hont sakit they magar us ki ankhon mein ek chamak thi, jaise mujhe se kehna chahti hon. Meri dimagh mein ek dum us raat ka manzar daur gaya aur yad aya ke mein ne hi usey kisi aur din milney ko kaha tha jis raat mein sach se batein kar raha tha (https://kashifmoten.wordpress.com/2015/07/13/sach-ke-saath-ek-mukalma-urdu/). Mein ne socha ke usey nazar andaz kar dun phir guman hua ke is ki halat to kuch apney jaisi hi lag rahi hai, kehna chahti hai to sunney mein koi muzaiqa nahi shayad mere sun lene se us ka kuch bojh halka ho jaye ga. Is soch mein tha ke mere qadam us ki taraf khud ba khud barhney lagey aur chaltey chaltey mein us ki taraf puhnch gaya. Ab hum dono amney samney kharey they, shayad hamari ankhein kuch baatein kar rahi hon, hont ab tak khamosh they. Mein kuch lamhon ke bad mein palta aur socha shayad mera wehm hai, ke achanak ek awaz ayi, us ne kaha “Kashif kahan jatey ho? Dunya ka dukh bant tey ho mera gham nahin banto gey? ” Yeh sun kar mein palta aur pas key ek ahatey mein beth gaya. Sab taraf khamoshi thi, parindey apney gharon ko laut chukey they aur dur sarak par bus aur wagon ki be hangam awazein arahi thein. Kehne lagi aaj mein tumhein apney barey mein batati hun, tum ne mujhe pehchan lia hoga mein wohi hon jo har jaga insaaf ki nishani ke taur par istemaal ki jati hun lekin dar haqeeqat har jaga mere sath zina bil jabr hota hai, meri ismat taar taar karke korion ke bhao bechi jati hai. Tumhein mein kai saal se wakil dar wakil munsif dar munsif aur court dar court ke chakar lagata apney haq ke liye larta magar mayoos laut ta dekhti hun, aur us raat bhi aj ki tarha mujhe Allah ne goyai di hai keh tum se apney dil ki baat keh sakon. Mein ne kaha kaho kia kehna hai? Us ne kaha yeh mera taar taar perahan dekh rahey ho? Mein ne kaha haan dekh raha hun, us ke jism par jagah jagah chaqu(dagger) ke nishaan, kahin koron ki zarb, kahin jaltey huey angaaron ke zakhm sab ayan they. Aur rotey rotey us ne apni kahani sunna na shuru ki, woh apne buzurgon ke zamaney se aj tak ka safar buhut khoobsurti se bayan karti rahi aur mein us ki takleef dekh kar dil hi dil mein rota raha. Kehti hai aj yeh insaaf ke thekedaron ne mujhe tawaif bana dia hai, jab chahtey hain jisey chahtey hain bech dete hain aur mazloom ki bad duain mujhe milti hain,” yeh jo gathrian dekh rahey us ney ek khoon mein lithrey huey ambaar ke taraf ishara kia aur kaha “yeh un mazloomon ke khoon ka bojh hai jo insaaf ki talash mein yahan aye. Jawan boorhey hogaye boorhey hasrat liye margaye aur naslein tabah ho gayein lekin yeh insaaf ka mandir jisey tum log court kehtey ho jahanumi choron ka akhara bana hua hai. Yahan insaaf paaney ke Khizar A.S ki umar aur Qaroon aur Namrood key mushtarika khazanon jitni daulat chaye, ghareeb o miskeen ki siskian to adhey rastey mein dam tor jati hain aur mein apney zameer par yeh bojh uthaye phir rahi hun, har shaks yahan imaan ka daweydar hai magar sab ki apni apni qeemat hai, koi piyar se bikta hai, koi aurat se, koi talwar se aur taqreeban sab hi paise ke pujari hain”. Us ki batein sun kar meri ankhein bhar ayein aur ansoo chalak gaye, awaz ki kasmasahat dur kar ke mein ne poocha ke tumharey galey mein yeh ahani tauq kis cheez ka hai? Us ne dukh bharey andaz mein kaha yeh tauq-e-Ghulami hai jo chand hazar ameeron ne mere galey mein dal rakha hai. Usey dekh kar ek sawal aur dil mein aya jise zubaan ne be qaid keh diya, “mein tumharey liye kia kar sakta hun?” Woh ashk baar hotey huey bhi muskurayi aur dua di, “Tum ne mere dil ka bojh halka kar dia, Allah tumhein roz e hashr khub nawazey, aameen” Yeh sun kar mein ne us sey rukhsat chahi aur kaha “chaltey hain but kadey se aye meer……….Phir milengey gar Khuda laya”, yeh sun kar who khil khila ke hansi aur phir hum apney judaa raston par chal diye.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s