Aj Kal Ki Anokhi Shaadian

Guzishta 30 saalon mein shadion mein riwaj ba tadreej badaltey ja rahey hain, lekin pichle 5 saalon mein to muazezeen e sheher ne kamal kardia hai. Kuch arsey qabl kuch ek anokhi shaadi mein shirkat ka ittefaq hua.

Mehndi ka hal yeh tha ke mehndi  kam aur tamasha ziada lag rahi thi. Larka rickshaw mein sawar ho kar aya, agey peechey logon ki kaseer taadad thi, us par zulm yeh ke rickshaw ka plug short hogaya aur us ne patakhon jaisi awazein aur beyhad dhuan chorna shuru kardia. Libaas mein Qameez jo keh intahai choti aur tang thi jis mein un ki taund(belly) kisi haamla aurat ki tarha numaya ho rahi thi goh ke (4th ) chothey mahiney ka hamal ho, pajama bhi chust aur churhidaar tha, galey silk ka dupatta kisi haya mand dosheeza ki tarha pehna hua tha . Aisey phansey huey bethey they jaisey zabardasti gaindey ko rickshaw mein bithaya gaya ho. Cameraman bhi bharpur koshish karney ke bawojood bhi unhein puri tarha frame mein nahi la pa raha tha, bechara baar baar peechey honey ki koshish mein logon se takra raha tha. Bahar nikaltey huey chust pajama keel mein phans gaya aur taar taar hogaya aur majbooran galey ka dupatta sari ki tarha lapetna para. Apni izzat bachatey, larkharatey huey unhon ne khud ko sambhala aur phir ek lambi saans li to kurtey ke kuch button urh ke goliyon ki tarha yahan waha bikhar gaye. Khair ba mushkil tamam un ki ismat ko dhank kar jaise taisey stage tak puhchaya gaya, aur gharwaley shukar ada kar ke side par hogaye.

Ab bari ek aur surprise ki thi, larki ki aamad ka intezaar tha keh hinduon ki rasoomat purey qaidey aur aiteqaad ke sath mukamal ki jaiein. Kuch der bey sar per ka nach gaana chalta raha jis mein mard aurat ki satr ke mutabiq aur aurtein ba mushkil tamaam mard jitni satr dhanpey huey thumkey laga rahi thein. Taqreeban adha ghanta yeh tamasha dekhne ke baad ek mughlia daur key bhoonpoo ki zordar awaz ayi, kuch log darutey huey agay aye aur un mein se eik ne ailaan karney ke liye makhmal ka kitabcha nikala aur yeh ailaan hua “Shahzadi……..binte falan falan apni shahi sawari mein tashreef la rahi hain.” Logon ki tawajah aaney waley rastey ki taraf markooz ho gaye aur sab intezaar mein tik tiki bandh kar bethey rahey. Chand lamhon baad dhol waley nazar aye to yeh itmenan hua ke shayad kuch saleeqey se arahi hon gi, lekin kuch hi lamhon mein yeh ghalat fehmi bhi durust ho gaye. Haathi ke cheekhney ki awaz ayi aur dhol waley khamosh ho gaye, ahista ahista haathi par doli mein sawar hathni nazar ayi. Hathi ki zor zor se chalti sansein dekh kar yeh samajhna mushkil ho gaya tha keh hathi ki kamar jhuk rahi hai ya bechara dard ki wajha se kanhaar raha hai. Haathi ki chalaney wala bhi kuch bhooka sa nau jawan lag raha tha. Khuda Khuda kar ke hathi aur us par bethi hathni pindaal ke beech mein puhnch gaye. Hum ne socha shukar hai ab jaldi jaan choot jaye gi, lekin ki khabar thi ke “picture abhi baqi hai mere dost!!” Ab dulhan ke utarney ki bari ayi to hathi ka bethne se sar a sar inkaar, kafi der guzarney ke bad logon ne socha ke ab koi aur tarkeeb larai jaye. Kisi ne seerhi laganey ko kisi ne crane bulwana ka mashwara de maara. Kuch logon ne dulhan ko jump maarney ka bhi mashwara de dia ke ap kudein hum pakar leingey. Yeh mashwara sun kar ird gird kharey logon ke khusar phusar ki aur us nau jawan ko peechey bhej dia. Buhut der ke baad hathi ke man mein ayi to who khud beth gaya aur apney upar se hathni ka bojh utar phenka. Dulhan ko pindaal mein puhnchaney ke baad phir wohi be huda raqs shuru hua aur ek ghantey tak jari raha. Phir kahin ja kar raat ka teesra pehr shuru hua aur khanay ki taraf logon ne daur lagayi. Jaisey taisey kha kar hum ne wahan se rukhsat li aur Allah se tauba ki ke aainda in ki yahan mehndi mein nahi ayeingey. Agley do din baad mezbaan ke yahan se phir phone aya aur unhon ne shaadi par puhnchney ko israar kia, rasm dunya nibhanaey ko hum chaley gaye lekin phir jo hua so kamaal hi tha. Dono dulha dulhan truck par kharey reh kar hall mein dakhil huey, truck ko phoolon se sajaya hua tha aur baraati ird gird be hangam raqs kar rahey they. Khair is baar unhon ne utaar ne ke liye maqool intezaam kar rakh tha aur ghaliban bahar qareeb khari fire brigade ki gaari bhi is hi liye khari thi. Truck ka dhuwan poorey hall mein bhar gaya tha aur kapron se diesel ki badbu aarahi thi. Is ke baad dulha ne dulhan ko uthaney ki naa kaam koshish ki jis ke nateejey mein who hazrat larkhra gaye lekin qareeb kharey doston ne farz nibhatey hoey sahara dia aur koi naa guzeer waqiya hotey hotey tal gaya. Dulhan ki maa kisi se keh rahein thein meri phool jaisi bachi is behnsey se uthai nahi jar rahi. Yeh sun kar mere dil mein aya ke keh dun keh woh phool nahi poora baagh hai magar chup rehney mein hi behtari mehsoos ki. Us ke baad mandap mein qazi sahib ko laya gaya jinhon ne apney bharpur andaz mein nikah parhwaya aur khamoshi se side par mere pas a bethay. Is doran kisi ki ringtone par hindu bhajan laga hua tha jo bajney laga aur logon ne be sakhta chawal uchalna shuru kar diye jo unhein khidmatgaar pesh kar rahey they. Larkey ne larki ke galey mein set pehnaya aur logon ne taliyan bajaein. Kuch der ko be huda music band hui thi to kaanon ko sukoon mila tha lekin jaisey hi nikah hua ek baar phir unchi suron wali chichori music phir shuru ho gayi. Maulana aur mein barabar barabar bethey they lekin jaise hi be haya naach shuru hua maulana sahib ke rukhsaar surkh ho gaye aur honton par tabassum bikhar gayi. Barey ehtemam se woh apni darhi mein khilaal kartey is nazarey ko apney andar jazb karney ki koshish mein magan rahey. Aisa lag raha tha keh abhi uthein gey aur naachna shuru kardeingey. Khair Khuda Khuda karke raat ko ek bajey khana shuru kia gaya lekin us waqt tak bhook mar chuki thi aur hum ne ghar ka rukh karney ka soch lia. Raat is soch mein guzar gayi keh akhir hum logon ko kia ho gaya hai? Subha phir se mezbaan ka reminder ka sms agaya keh valima mein ap ko zaroor shamil hona hai, mein ne telephone kar ke maazrat karney k+i naa kaam koshish ki lekin majal hai jo woh apney israar se tas se mas ho jaien. Majbooran aur intahai ba dil e na khwasta mein ne janey ka faisla kia, aj mein bhi dil hi dil mein tamasha dekhney ko beechen tha keh aj kia naya drama hoga. Raat ko jab hum puhnchey ko ki dekhtey hain keh ek khoobsurat saji dhaji magar racing gadha gaari par dono dulha dulhan sawar ho kar hall ke andar chaley arahey hain. Gadhey ko dekh kar afsos hua ke becharey gadhey par kitna zulm hai do aur gadhon ka bojh utha kar ghaseeth raha hai. Aur phir apney singhasan par jaa bethey jahan chhamchageer tabiyat ke logon ne tauseef ke pull bandhnay ka theka le rakha tha. Akhirish shaam apney ikhtitam ko puhnchi aur dabbey paon wahan se chal diye.

Is shaadi ke tamashey ko dekh kar mehsoos hua keh Pakistan ke ameer logon ko munfarid dikhney ka itna soqch hai ke woh kisi bhi had tak ja saktey hain.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s