Anmol se bey Mol Tak Ka Safar (Romanvi Afsana)

Yeh kahani us waqt ki hai jab bazaar e husn ek khaas ilaqey tak mehdood hua kartey they. Yahan nawab, aur degar umara hai waqt apni shamein rangeen karney ajatey aur raat ki tareeki mein apney gharon ko laut jatey. Bazaar mein neechey bethey kuch gul farosh, kuch gilorian chabatey tablah nawaz, chai khaney par bethey kuch adher umer log, kanchey kheltey laundey aur chaubarey par baithi kuch boorhi tawaifein nazar ati thein. Samaaton mein kothon par bajti hui ghungroon ki jhankar aur rang be rangi jalti bujhti shamaein, ek alam e wehshaat ka samaa bandha huey rakhti thein. Kuch boorhey shatranj ki bazi lagaye, huqqa gurgura rahey hotey,aur kuch awara sharab khanon ke bahar bethey bheek mangtey dikhai dete they.

Mein har shaam apni naukri se lauttey huey bari sarak ki bajaye is muhalley se guzar kar apney ghar jaya karta tha. Kuch arsey tak rozana guzarney ke baad sab chehrey jaisey jaaney pehchaney ho gaye, kabhi who mujhe dekh kar muskura dete kabhi mein unhein salaam karleta aur yun ke anjana sa taaluq ban gaya tha. Pehle-e-pehl kuch ne awazein kasein phir kuch hafton baad unhon ne bhi dewana samajh kar chor dia.

Ek roz ki baat hai hamarey seth sahib ki khush daaman ka inteqal ho gaya tha, is hi khushi mein unhon ne hamein chutti aur thori si bakshish de di, bazahir to udasi ka libada ourh tha lekin haqeeqat kuch aur hi thi. Faraghat o bakshish key bais aj mein ne bhar pait khana khaya aur ghar laut tey huey socha keh aj bazaar e husn ki haqeeqat dekhi jaye, aur is hi soch mein chaltey chaltey us tang o tareek galion waley badnaam e zamana muhalley tak puhnch gaya. Abhi bazaar ki ronaq apney joban par na ayi thi, log ahista ahista apni jagha par jama ho rahey they. Chorahey par laundey bhi naa they, chausar ki bazi lagaye boorhey bhi nap payed they. Aj mein khilaaf e zabta buhut dheemey chal raha tha, sab kuch alag sa tha, naa woh ronaq, naa woh ghungroon ki khanak, bas chopaye par bethey kuch tawaifein aur kuch unke yahan kam karney waley tabalchi nazar arahey they. Chaltey chaltey achanak meri nazar ek tanha bethi tawaif par pari, woh nangey sar aasman ki taraf nazrein uthaye kuch kehti aur chabootrey par kabootaron ko bajra khila rahi thi. Kuch lamhon ke liye mein dekhtey dekhtey theher gaya, mujhe maalom na tha keh who roz mujhe dekhti hai, jaise hi agey barhney laga us ney mujhe awaz de kar kaha “kion chotey mian aj itna sawerey sawerey laut ke ja rahey ho?”hamari nazrein char huein to yaad aya yeh wohi hai jo roz takht par saj dhaj kar tanha bethi hoti hai.

Dikhney mein woh saada libasi mein kahein darja behtar lag rahi thi. Mein ne hichkichatey huey jawaab dia “ji bas”aur yoon poora maajra bayan kia. Apney akhri jumley ki zaroorat par ghaur hi kar raha tha keh us ney mujhe apni bheegi hui ankhon se dekha aur kaha “Itni tapti dopeher mein piyasay hogey, aao baitho mein pani pilati hun”. Na jaaney aisi kon si kashish thi keh mein us ki taraf khicha chala gaya. Mein chabootrey par ja betha aur us ne mujhe mashkeezey se pani nikal kar ek chandi ke piyalay mein diya. Kuch lamhon ke liye mein us ki ankhon mein dekhta raha, aur us key ansuoon se labraiz pemaney chalak gaye. Mein ne poocha “kia baat hai, ap ki ankhein kion num hain.” Jawab mein woh muskurayi aur apney perahan se aansoo ponch liye. Kehney lagi “koi baat nahi hai bas yun hi dil  bhar aya to ankhein chalak gayein”. Mein ne israar kia keh “ap ne mujh piyasey ko pani pilaya hai apna ghum bhi baant lein shayad kuch dil ka bojh halka ho jaye”. Sun kar woh khila khila ke muskura uthi, us ke rukhsar tamtama uthey aur us ney kaha “kion chotey mian kia shair kehtey ho ya mujh par fida ho gaye?” Mein ne kaha “sochta hun ap ki savaana e hayat likhon”,Us ki ankhon ki chamak shayad jaise laut ayi ho aur us ney sharm se ankhein jhuka lein.

Naam daryaft karney par kaha “sahi naam ka to pata nahi bas itna dhundla sa yaad hai keh mein ne ankh kholi to khud ko yahin paya aur tab se log mujhe Shab Jan bulatey hain”. Woh apnay barey mein batati rahi aur mein khamosh sunta raha, kabhi us ka chehra khushi se khil uth ta to kabhi murjha jata. Kuch ghantey beet gaye magar pata hi na chala. Yun agley chand mahiney mein aur shab jan bazaar e husn ke khamosh ho janey ke baad baithtey, aur mein us ki zindagi ko samajhney ki koshish karta.

Guzishta 6 maah ki tarha mein aj bhi bazaar band ho janey ke baad gaya, dekha keh log us chabootray ke ird gird jama hain jahan mein aur shab jaan bethey batein kia kartey they. Ek alam haibat mein logon ki bheer ko cheerta hua jab agey puhcnha to shab jan ki akhri sansein chal rahi thein,us ne mujh se kapkapati awaz mein kaha “apney hathon se akhri ghoont nahi pilao gey chotey mian? Mein ne hath barha kar us kar sar apni godh mein rakha aur pani pilaney laga, agely kuch hi lamhon mein us ney ek aah bhari aur us ka dum nikal gaya. Ird gird maujood log jaisey be maaney ho gaye they meri ankhein bhi chalak gayein. Ek saf e maatam bich gaya tha, buhut se tawaifein bhi apney kothon se utar neechey a pohnchein.

Kisi ko apni izzat ka paas tha to kisi ko dekhey jaaney ka khauf. Akhirish tawaif ka janaza tha, shareefon ka wahan kia kaam. Mayyat tayar honey se tadfeen tak ke safar mein buhut kam log sath reh gaye. Imam e masjid ne bhi nagawar e khatir andaz mein janaza parhaya. Jaise taisey mein aur wahan maujood char logon ne Shab Jan key janazey ko kandha dia aur usey supurd khaak kardia. Shab jan ke parda kartey hi sab chaley gaye aur usey tanha chor dia. Mujhe hairani hui, keh jo log us ka mujra dekhney barey shoq se bazaar e husn atey they aj us ki mayyat ko dekh kar aisey bhagey jaisey koi achoot ho.

Log mujhe Shab Jan ka ashiq samajhtey they lekin mera aur us ka dil ka rishta tha, ek rishta jo lafzon se kahin balaatar tha. Us ki ek baat mere dil par aj bhi naqsh hai woh kethi thi “Jis waqt tak tawaif bazaar e husn mein nahi ati anmol rehti hai, lekin jab qeemat lagti to baa mol ho jati hai aur kuch arsa guzarney ke baad woh apni qeemat kho deti hai, aur bey mol ho jati hai”.

Kitni ajeeb baat hai waqt ke saath saath insaan ki qeemat bhi badalti rehti hai, aj bhi kabhi kabhi mein shab jan ki qabr par jata hun to us ki awaaz ati hai, “kion chotey mian meri sawaana hai hayat mukamal karli?” aur mein jawab mein be sakhta keh deta hun “Shab jan khoon se likh raha hun abhi waqt lagey ga ” . Us ki muskurahat meri samaaton mein goonjney lagti hai aur num deeda us hi chabootray ko laut jata hun.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s